|| Ambahanon || || Babaylan || || Binalaybay || || Hiligaynon Nation || || Hinilawod || || Home || || Kasugoan || || Learning Hiligaynon || || Mythology || || Panimalay || || Pulong || || Sign the Guestbook || || View the Guestbook || Ang Bayong Kag Banga ni Flavio Zaragoza Cano
	Sugiran ta kamo, kag akon isaysay isa ka natabu sa isa ka lin-ay, matahum sing guya, sing lawas matibsul, bukad sang kabugaw, daw bukol sang doldol... Kong magka-agahon, nagasipit sang banga, kay siang magasag-ub sing tubig sa suba... Banga nia mabilog, kay diutay sing baba, matapuk sing buli kag dali mabuka. Sa amo nga ti-on, isa ka binata, kay sia man masag-ub sa pang-pang sang suba,	iya nga nakit-an sang iya paglantaw ma-anyag nga lin-ay sang gugma gapukaw Dayon pinatindog bayong nga kawayan agud nga si Inday iya mabuligan... Apang sa hinali ang bayong napukan, nabu-ong and banga kay among natup-an... Gani mga nene, inyo gid amligan nga'ng inyo banga dili mapukanan agud sa gihapon kamo may sulodlan kag kamo may tubig nga sarang ma-imnan.
	From the private collection of Freddie Pamulag and Jeremy Bionat.
	Sa Dalagang' Ilong-Ilonganon ni Flavio Zaragoza Cano
	Mutya nga labing masili Sang Kabisay-an nga baybay, Batyaga ang akon balaybay Sa dughan nimong hamili; Ikaw sang Diwa ginpili Nga kalipay kag kapawa Kay ang imo halimbawa Matahum nga banagbanag, Ang putli nimong kasanag Sang dampog nagapahawa Puni ka sang kalibutan Kag sang Ginuo gintanyag Ang himpit nimong' kaanyag Sa duta kong nalulotan; Akon ka ginadulutan Sing bulak sang pag-ambahan, Ikaw sang gugma simbahan Kag tuburan sang himaya, Bukad nga dili malaya, Dugos sang pagkabulahan...! Labi ka pa sa bulawan, Labi ka pa sa bituon; Sa dughan amon taguon Balaan nimong larawan, Sang dungog ikaw ban-awan Nga dapat ipabantala, Sa tunga sang taliwala Kag sa kasanag sang adlaw, Kon ikaw magkulukadlaw Ang sakit nagakapala...! Kabay pa mangin huaran Ang bukol nimo nga bulak, Kabay pa dili mapulak, Sa sawi nga kapalaran; Sing dugu akon halaran Maugdang mong pamatasan, Agud, bisan mapilasan Kag sa lulubngan magdayon, Sa gamot sang kamatayon Manugdo ang Kaluasan...! Daw bulak ka sang sampaga Nga wala'y dalang salait, Pispis ka sang paghidaet Kag kabugwason sa aga... Oh, mayuyum nga dalaga Nga sa Ilong-Ilong sumilak, Diwa kang makahililak Nga kumunsad sa Madyaas Kag ang dungog mong' mataas Dili mabaylo sang pilak...! Guya mong' manayanaya Ilingig sa nasakitan, Ang kasakit nga dalitan Ang imo yuhum lipaya; Ang hulunihon sang maya Sa kadadalman sang talon, Nagsuno sa akon bikwalon Nga tingug sa pagsaulog, Agud mo lamang ihulog Ang gugma mong malahalon...!	Yari na sa imo atubangan Dala'ng taming kag sanduko, Pagdaug ang ginabuko Sa tanan nga dalagangan; Kag kon sin-ong makulangan Mangahas sa imo magmulay, Sa akon kusog magahulay, Mapukan sa kahamakan Agud sia pagatapakan Sang imo nga pagkaulay...! Kadugo sang Baganihan, Kaliwat sang Manunugma, Gindulot sang paghigugma Sa Gining nga nawilihan... Gumikan ako sa Amihan, Duta sang mga Pandita, Nagkari sa pagpangita Sa imo, nga nagapasilong Sa langit sang Ilong-Ilong Kag sa pakpak sang balita...! Mapung-aw ang hulunihon Sang Subing ko kag Tulali, Daw lagpuk sang ginakali Nga lungon, sa kagab-ihon... Imo lang abiabihon Ang tangis kong' ginahalad Kay ining kubos sing palad Nga sa kalipay ginkuha Nagainum sang iya luha Dala pa ang batyay nga salad... Sa tunga sang kabudlayan Sing kusog ka makahatag Agud masulit sa patag Ang bantog nga pag-awayan, Kon ang latagon agayan Sang dugong nagasagabay Kag lamang ang pag-unahay Sa kapagsik amo'ng anyo, Patadyong nimo kag panyo Ang akon magin hayahay...! Gani, dili ka mahangawa Nga ang banwa mangin ulipon, Kay kami nagatilipon Bangud sang imo kapawa Sang imo nga pagkaawa Sa Anak nga nalulotan Di' mas-a matugotan Nga may maglupig sa amon, Kay ikaw ang iloy namon Sa ibabaw sang kalibotan. Kunina, kon panaglitan Mahamak ang akon lawas Kag ang kabuhi magkawas Sa pilas sang kasakitan, Kon basi ako'ng painitan Sa udto nga labing masili Nga'ng handong igadumili Sang kaaway kong' bakakon, Putsa man ang bangkay nakon Sang lambon nimong' hamili...!
	From the document archives of Sidlangan.
	Singsing ni Dreamrose Barcebal-Petinglay
	san-o mo pa huksun sa imong tudlo ang nagalubad mo nga singsing? imo gid naman-an nga amo ria ang kanimo nagkurong sa hayub-hayub nga payag nga ginpatindug kang imo nga bana. wara mo gid haw kato mamulalngi nga malubadun ang singsing nga anang gintanyag kanimo?	kon nagaulikid ikaw gid man sa sampudyot nga bibig nga nagatabid sa imong urutngan himutadi kamayad kon nagakabagay man ang nagalubad nga singsing sa imong malakandila nga tudlo.
	From the collection of Kinaray-a poetry of Mrs. Ruth C. Corvera.
	Reklamo sa Embassy ni Albert Fred Magluyan
	sir kabulig pa bala dya ang nasudlan ko hamakun mo ria bag-o ko pa lang nasindihan ang stob agod magtig-ang singgitan kaw run nga magtimpla ka kape tapos ko panglampaso nagasarakit likod ko ka kusu kang gatambak nga ralabhan tapos ko lang ka panghalay singgitan kaw ruman nga marigos gabii run kag mapunpon ko ang mga hinalay.
	From the collection of Kinaray-a poetry of Mrs. Ruth C. Corvera   || Ambahanon || || Babaylan || || Binalaybay || || Hiligaynon Nation || || Hinilawod || || Home || || Kasugoan || || Learning Hiligaynon || || Mythology || || Panimalay || || Pulong || || Sign the Guestbook || || View the Guestbook ||

Return to top